作為法國奪得世界盃冠軍嘅功臣之一，基利安麥巴比無疑係現時地球上最具天賦嘅年輕球員，甚至佢已經被評為現今最出色嘅球員之一。

唔單只表現出色，麥巴比嘅身價亦都一樣誇張。2017年夏天，麥巴比以先借後買嘅形式加盟巴黎聖日耳門，其身價亦一下子暴升至1.8億歐元，僅次於由巴塞隆拿加盟PSG嘅尼馬。

不過，事實上當日麥巴比加盟PSG前，除左有皇馬同佢地進行爭奪之外，麥巴比開出嘅簽約條件亦都非常苛刻，甚至可以被認為係「獅子開大口」！

首先麥巴比向PSG要求，如果佢能夠奪得金球獎，咁樣佢就要自動成為隊內第一高薪球員，亦即係隨即可以與尼馬嘅人工扯平，由年薪1000萬歐元暴升至3000萬歐元。不過，PSG亦都無咁容易做水魚，佢地拒絕左麥巴比嘅要求，並換成如果奪得金球獎就可以獲得50萬歐元嘅一次性特別獎金。

另外，麥巴比亦要求PSG保證，如果球隊因為歐洲足協嘅財政公平原則而被罰無得踢歐聯的話，咁樣球隊亦都要對其進行賠償。不過，呢一點PSG亦都一口拒絕左。

最後，麥巴比又要求球隊為佢個人提供每年可以使用50小時私人飛機，但呢一點球隊亦都無答應，換黎嘅係球隊願意支付每月3萬歐元嘅房屋補貼及3名僱員、管家、司機及私人保镖嘅支出。