前車路士傳奇前鋒杜奧巴(Didier Drogba)今日喺個人Twitter上宣佈掛靴，正式結束自己20年職業球員生涯。

其實早喺去年11月嘅時候，杜奧巴已經放風表示自己會於2018年退役，只係未知確實時間。黎到今日，40歲嘅杜奧巴確認正式從球場上退落黎，本來作為美職聯球隊鳳凰城上升嘅班主兼球員，如今將不再擔任球員一角了。

杜奧巴嘅退役感言表示：「一切從1989年開始！當我回想過去20年職業生涯，我所得到嘅已經令自己感到無比驕傲及不能得到更多。不過，更重要嘅係呢個過程令我變成一個真男人。如果有人同你講，你嘅夢想太大了，只需要同佢講聲：多謝，然後更努力及聰明的令佢變成事實#經常相信 我想感謝所有我曾經遇過的球員、經理、球隊及Fans，是你們為我譜所呢段旅程。還有就是我的家人，我要給你們一個擁抱。無論起起跌跌，我的球隊都一直支持著我整個生涯。期待著我的新一頁，願神祝福我好像我的職業生涯一樣。」

pic.twitter.com/z1xwPhX22H

— Didier Drogba (@didierdrogba) 2018年11月21日

杜奧巴出身於科特迪瓦，5歲被父母送到住喺法國嘅叔叔家，10歲開始加入法國球隊開始進行青訓，1997年轉到勒芒繼續進行青訓，並於1988-99球季正式成為職業球員。

雖然成為職業球員，但杜奧巴首季並未有太多上陣機會，直至1999-2000球季，佢終於可以有更多上陣時間，並全季取得7個入球。2001-02球季，杜奧巴轉戰另一支法甲球隊甘岡，喺球隊嘅第二季佢迎來大爆發，單季上陣39場攻入21球，隨即被馬賽睇中，並以330萬鎊收價。

加入馬賽後，杜奧巴嘅表現更進一步，整季上陣55場攻入32球，順利成章成為當屆法甲最佳球員。憑住呢一季，杜奧巴成功被車路士睇中，並以破當時車路士隊史紀錄的2400萬鎊進行收購。

加入車路士後，杜奧巴向全世界展示佢得天獨厚嘅「魔獸」身體質素，加盟頭兩季已兩度協助球隊奪得英超冠軍，其後佢亦都越踢越有，分別喺2006-07及2009-10奪得英超神射手獎項。而更重要嘅係，杜奧巴喺自己離開車路士之前最後一季(2011-12)，成功助球隊奪得夢寐以求嘅歐聯冠軍，最終佢為車路士奪得4次英超冠軍、4次足總盃冠軍、3次聯賽盃冠軍及1次歐聯冠軍。

離開車路士後，杜奧巴曾效力過上海申花、加拉塔沙雷、蒙特利爾衝擊、鳳凰城上升及曾經回歸車路士一季。

杜奧巴雖然喺英超只係有8年時間，但佢已經證明自己係世界最頂級嘅「空中霸王」，亦都係英超史上最出色嘅前鋒之一！