杜克大學今年夏天獲得NCAA有史以黎最強的高中生組合，就係2018 ESPN100大高中生排名前三球員：R.J. Barrett、Zion Williamson、Cam Reddish，再加上當屆全美最佳控衛Tre Jones。杜克被評為提早學識抱團，而佢地呢班怪物亦成功喺場上打出恐佈表現，基本上每一個對手都被佢地血洗，除左令佢地首吞敗仗嘅Gonzaga大學。

雖然杜克首嘗敗績，但相信仍然無阻Barrett及Williamson成為來年NBA選秀嘅狀元大熱。咁究竟呢兩位球員邊個更強，邊個對如今嘅杜克大學影響力更深，邊個更值得成為來年嘅NBA選秀狀元呢？

喺加入杜克大學成為隊友前，外界都認為Barrett整體上要比Williamson更出色，特別係佢有以17歲之齡帶領加拿大U19擊敗美國隊U19，奪得FIBA U19世錦賽金牌嘅經歷，再加上被評為單挑能力同齡之中已經無人能及，所以喺高中排名Barrett都成功壓倒Williamson。

不過，黎到NCAA嘅成功，一切都會有所唔同，以下將會以幾項主要數據進行分析，睇下究竟如今嘅Barrett同Williamson誰更強！

數據(場均)

Barrett：22.8分5.7籃板4助攻0.7抄截0.2封阻，投射命中率40.8%、三分球命中率31.6%

Williamson：20.7分9.5籃板2.2助攻1.5抄截2.7封阻，投射命中率65.3%、三分球命中率25%

從今季數據上睇，Barrett得分能力比Williamson更高，但係整體上後者更加全面，而得分效率Williamson就更加比Barrett高出不少，三分球雙方則相差唔算多，有唔少空間可以提升。雖然係咁，Barrett較為佔優嘅係創造能力，相反Williamson更多嘅係終結球。

結果：Williamson勝！

球隊數據

Barrett：進攻109.3、防守100.8、差距8.5

Williamson：進攻138.9、防守89.6、差距49.3

呢個數據可能係體現兩位球員嘅分野！當Williamson在場及不在場嘅分別非常明顯，如果將Williamson換下場杜克大學隨即會變得方寸大亂。雖然Barrett對杜克仍然非常重要，但當佢被換下場嘅時候，球隊嘅情況並唔算有好大嘅影響，特別係Cam Reddish同Barrett無論係身型同作用都有唔少相似嘅地方，所以可以頂替對方大部份工作。

不過，杜克大學入面就無人好似Williamson，特別係佢嘅防守作用係無人能代替的，所以只要佢被換下，杜克嘅防守就會有質嘅下跌。

結果：Williamson勝！

得分能力

呢一點相信係二人最接近嘅地方，其中Barrett場均得更多，但Williamson嘅得分效率就更好。目前為止，Barrett嘅投籃選擇開始被質疑，但這是可以通過更多經驗去改善的，其得分能力則不分內外，籃底擁有終結能力，三分球亦難唔到佢，命中率亦比Williamson更好。再加上身高6呎7吋嘅Barrett擁有一手不輸控衛嘅控球，這令佢組織進攻變得更加出色。

Williamson嘅終結能力不容置疑，其爆炸性嘅身體質素令佢輕易能夠完成入樽，因此比賽期間佢更多以入樽完成得分，所以命中率一般都非常高。雖然佢亦都有三分球能力，但係命中率卻有待提高，要知道單靠身體質素進入NBA係難以長久的。不過，Williamson亦都有另一點彌補佢嘅遠投命中率，就係進攻籃板能力，因為成功搶到進攻籃板將可以增加佢進攻嘅次數及得分。

其實兩人嘅得分能力都不相伯仲，不過瓣數就以Barrett更多。

結果：Barrett勝！

組織能力

呢一點好似上面提到過，Barrett擁有更好嘅策應能力，從助攻數上已經可以睇得出。另外，出色嘅控球能力亦都令Barrett比Williamson有更好嘅組織能力。

可惜嘅係，Barrett不時都會進入個人英雄模式，令佢係關鍵時刻唔識決定應該自己得分定係傳球助攻隊友。如果佢能夠解決呢個問題，Barrett絕對可以成為更出色嘅球員。Williamson雖然都可以持球進攻，但明顯佢嘅控球唔算非常穩，失誤亦都不時會出現。

結果：Barrett勝！

防守

你可能會被Williamson誇張嘅入樽所影響，實際上佢嘅防守能力堪稱一絕，好似佢面對Army嘅時候就曾交出過6次封阻。

雖然有時會出現犯規，但無容置疑嘅係Williamson絕對係杜克大學防守體系中極為重要嘅一環，佢係出色嘅籃框守護者，即使面對錯對防守亦都唔會有太大問題，基本上佢可以守到1號位至4號位。

Barrett雖然無Williamson喺防守端咁嚇人，但佢身高手長，仍然係一名出色嘅防守者，杜克出色嘅防守亦都唔可以少左佢。

結果：Williamson勝！

總結

兩位球員嘅能力其實都非常接近，但係Williamson在NCAA嘅表現要比Barrett更好，佢嘅進攻效率極佳，防守端又非常出色。Barrett則有能力成為未來NBA全明星級別球員，而佢嘅創造力亦都協助Williamson及其他球員喺場上更好咁表現自己。

結果：Williamson勝！