據最新消息指，皇馬門將拿華斯已經向球隊要求喺黎緊嘅1月冬季轉會窗離隊，因為佢難以忍受正選位置被高圖爾斯不明不白咁搶走左，要知道佢喺皇馬連奪三屆歐聯冠軍嘅首席門將及功臣。

對於31歲嘅拿華斯要求離隊，皇馬方面並不願意見到，因為佢地希望有一位門將可以充當高圖爾斯受傷時嘅後備。

26歲嘅高圖爾斯今年夏天踢完世界盃之後，以3500萬鎊從車路士超值價加盟皇馬，雖然一開始拿華斯仍然佔據主力門將位置，但後來後後卻失去正選，如今喺新領隊蘇拿利手下就更加失去上陣嘅機會。

高圖爾斯今年係金球獎門將位置中排名最高嘅球員，再加上其年齡更輕，拿華斯要想重新奪回正選位置睇黎機會不大。拿華斯亦曾經向媒體表示：「我從歐聯三冠成員到如今不能上陣。」可以睇到呢位哥斯達黎加嘅門將係幾咁唏噓。

其實拿華斯嘅表現絕對配得上皇馬正選門將位置，睇番數據高圖爾斯今季為皇馬上陣14場失左18球，平均每場失1.29球，而拿華斯上季則上陣44場失49球，平均每場失1.11球，今季佢則上陣7場失7球，平均每場都只係失1球。

皇馬方面其實都應該要認真考慮拿華斯嘅要求，話晒佢都係球隊嘅功勳球員，再加上球隊目前後備門將方面又有老將卡斯拿，年輕門將又有施丹兒子盧卡施丹，只要高圖爾斯無咩大傷，相信後兩位門將都絕對有能力分擔門將位置嘅責任。