經過10幾日嘅賽事後，英國桌球錦標賽決賽由衝冕嘅「火箭」奧蘇利雲面對馬克艾倫(Mark Allen)，最終19局10勝嘅賽事由「火箭」以10:6擊敗對手成功衛冕，同時呢個係「火箭」生涯第34個排名賽冠軍及其第7個英國錦標賽嘅冠軍！

今次賽事「火箭」基本上狀態十足，無咩對手能夠比到太大壓力佢，唯一就係64強個陣面對Ken Doherty嘅時候需戰至最後一局先以6:5淘汰對手晉級，其餘都係以6:0或6:1晉級，直到決賽。

而作為「火箭」對手32歲嘅艾倫目前排名世界第7，佢晉級決賽期間多次需要打至生死局，面對「火箭」雖然仍有一點反抗嘅能力，但最終實力上都係存在不少差距，最終「火箭」成功帶走勝利。

成功奪得冠軍嘅「火箭」，成功刷新多項紀錄，除左自己個人生涯排名賽冠軍增加至第34個(僅落後亨特利2個)，今次亦都係「火箭」第7個英錦賽冠軍，超越Steve Davis嘅6冠。另外，「火箭」亦成功奪得三大賽嘅第19冠(英錦賽、世錦賽、桌球大師賽)，正式超越亨特利嘅18個。

對於目前世界排名第3位43歲嘅奧蘇利雲黎講，今次再一次奪冠佢感到非常高興，佢更希望自己未來能夠再次成為世界第一，不過佢同現時世界一哥沙比仍然有唔少距離，即使加上佢今次英錦賽冠軍嘅17萬鎊，而佢期盼著呢個成就嘅到來。