遲到呢個問題，相信唔少人就算自己無習慣性遲到，但身邊都總會有咁樣嘅朋友或者同事。而呢種壞習慣係無論你係咩人咩職業都會出現的，當中包括身價過億嘅足球球星，巴塞隆拿嘅新星迪比利就係因呢種壞習慣而為人垢病。

21歲嘅迪比利2017年夏天以1.05億歐元身價加盟巴塞，以頂替離隊嘅巴西球星尼馬。加盟首季，迪比利仍處於適應階段，所以表現並未能令人滿意。不過黎到今季，迪比利終於上力，多次為球隊帶黎重要嘅入球及助攻，成為球隊重要嘅一員。

雖然場上表現給力，但係迪比利卻仍然被外界評為問題人物，因為佢嘅遲到問題非常嚴重，甚至已經蓋過其場上出色嘅表現。

消息指，迪比利喺巴塞平常嘅訓練課經常遲到，其中包括一次對貝迪斯前嘅訓練，呢位法國翼鋒夠膽死遲左5個鐘，最終令領隊華維迪決定唔比佢進入比賽大名單以作懲罰。不過，睇黎迪比利並未因此而改過，喺擊敗愛斯賓奴後第二日嘅訓練課中，迪比利再一次遲到兩小時，佢喺球隊接近完成訓練前先黎到訓練場，所以基本上係無做過任何訓練。

其實過去唔少球員都有遲到或賴理訓練嘅問題，而當中一些被評為天才嘅球星尤其嚴重，就好似當年同樣效力巴塞嘅朗拿甸奴就經常唔參加訓練，就算真係黎到訓練場亦走去訓覺，係比賽前一天佢先會盡力參與訓練。

如今迪比利又係一啲都唔自律，但又真係喺比賽入面交到功課，唔通真係有天賦嘅球員就可以任性？