今年年中，「大馬一 哥」李宗偉宣佈退出多項賽事，其後公佈自己確診患上初期鼻咽癌，需要休養一段時間。相隔接近半年嘅治療及休養，李宗偉終於宣佈將會於明年1月重投訓練，未來再次參賽指日可待！

現年36歲嘅李宗偉較早前出席記者會表示，自己並無退役嘅諗法，甚至仍然以進軍2020年東京奧運為目標！

而日前，李宗偉更於患病後首度出席活動公開亮相，現場亦有唔少其球迷到場支持。對於自己嘅情況，李宗偉表示自己狀況良好，明年1月將會重返訓練場測試自己嘅身體表現。不過，李宗偉亦唔敢太過樂觀，佢都知道要重返原來嘅狀態絕對唔簡單，所以會先以體能為主進行操練。

唔好睇李宗偉好似好堅強咁克服鼻咽癌強勢回歸，佢憶述當日得知自己患上癌症後，抱著太太痛哭，並問：「點解係我？！」不過，擁有運動員不服輸性格嘅李宗偉好快明白，無論點生活都要繼續，所以佢勇於接受治療。

回顧治療嘅情況，李宗偉表示當中相當難受，其中包括需要進行33次質子治療，而去到第三週佢已經唔能夠講野，甚至連吞野都做唔到，只能夠飲牛奶，可想而知要走過呢條路係幾咁困難。

作為曾經嘅世界一哥，李宗偉基本上拎晒所有大獎，唯獨奧運係佢目前最大嘅遺憾，因為佢2008、2012及2016年都只能夠屈居亞軍，所以佢好想再次挑戰呢面金牌，並且同時想實現連績參加5屆奧運會。