雖然MenClub嘅巴打未必對《大叔的愛》呢套日劇感興趣，但偏偏呢套腐女日劇又成功入屋，吸引眾多女女收看，就連唔睇BL嘅女仔亦都沉埋一份。《大叔的愛》更於2018東京電視劇大賞中奪3冠，而且仲係Twitter Japan喺2018年度中最多被使用嘅Twitter帳號同標籤，可以睇得出《大叔的愛》真係相當有話題性，家下佢仲決定出埋電影版，巴打們唔想同女仔冇話題的話，唔睇都要識少少扮下代表呀！

《大叔的愛》電影據聞係延續日劇嘅結局，角色唔會換，將會由原班人馬繼續日劇之後發生嘅故事。喺呢度同大家前情提要一下，《大叔的愛》其實係講述冇異性緣嘅異性戀主角春田創一，被尊敬嘅上司部長黑澤武藏及同事兼室友嘅後輩牧凌太告白，進而展開戀愛喜劇故事。

電影版除咗主演三人不變之外，內田理央、金子大地、伊藤修子、兒島一哉、大塚寧寧等班底都會繼續參與電影演出。而《大叔的愛》電影版預計出年夏天會上映，如果巴打身邊都有女性朋友鍾意呢套日劇，不妨同佢講下多個話題！