今年金球獎排名中，5屆得主美斯竟然三甲不入，最後更只係排名第5位，令唔少人大跌眼鏡。雖然係咁，但亦有人覺得美斯仍然係世界最佳，其中相信包括前阿仙奴法國中場皮利斯。

皮利斯作為中場，曾在法國隊及阿仙奴分別與施丹及亨利兩位世界級球星做隊友，並且三人亦曾經一同奪得1998年的世界盃冠軍。不過，呢位中場卻認為美斯比起佢兩位前隊友處於更高水平，因為佢擁有與別不同的特質。

2006年，皮利斯轉投西甲嘅維拉利爾，並有機會喺聯賽入面對上美斯、C朗拿度、朗拿甸奴等巨星，不過皮利斯卻認為，唔單只上面提到嘅施丹同亨利，就算C朗同細哨都唔係美斯個皮。就好似岩岩巴塞以4:0擊敗愛斯賓奴，皮利斯認為如果美斯可以保持呢場嘅表現，基本無人可以阻止到佢。

對於美斯，皮利斯絕對係報以萬二分佩服，佢覺得美斯就係擁有其他人無嘅特質，雖然佢唔敢講美斯係足球史上最出色嘅球員，但可以達到佢嘅高度嘅球員就真係少之又少。