憑住美斯持續不斷嘅超級表現，巴塞隆拿佔據住西甲第一位置，而佢個人亦以14個聯賽入球排名射手榜榜首。不過，目前巴塞僅以3分優勢領先西維爾及馬體會，與以往奪得聯賽冠軍時嘅無敵姿態，如今嘅巴塞優勢已經無咁明顯，其中一個原因係球隊陣容已經開始老化。

面對老化嘅陣容，巴塞高層已經準備開始換血，其中即將32歲嘅烏拉圭射手蘇亞雷斯有傳會被球隊逐漸放棄，即使佢目前仍然以11個聯賽入球排名射手榜第2位。

有消息指，7位年輕射手已經成為巴塞嘅目標，佢地將好大機會喺未來取代蘇亞雷斯，成為球隊嘅主力射手。

Kasper Dolberg - 21歲，效力阿積士。2016-17球季開始效力阿積士嘅Bolberg，目前一共為球隊上陣94場攻入39球，而佢亦協助球隊目前排名荷甲聯賽榜首。

Timo Werner - 22歲，效力萊比錫。2016-17球季由史特加轉投萊比錫，至今一共上陣96場攻入55球，今季則19場攻入13球，效率相當不錯。

Maxi Gomez - 22歲，效力切爾達。上季由烏拉圭球隊迪芬沙士砵亭轉投切爾達，隨即成為球隊主力射手，上陣39場攻入17球。而黎到今季，目前上陣14場攻入8球。

Krzysztof Piatek - 23歲，效力熱拿亞。今季前Piatek一直都係喺波蘭聯賽效力，今季轉戰意甲大放異彩，目前以12個入球領先意甲射手榜，比C朗拿度仲要多入1球。

Luka Jovic - 20歲，效力法蘭克福。目前從賓菲加外借至法蘭克福嘅Jovic，今季表現出色，以10個入球與另外3位球員並列德甲射手榜第2位，僅落後第1位嘅艾卡沙1球。

Nicolas Pepe - 23歲，效力里爾。18場聯賽攻入12球，與麥巴比及艾美蘭奴沙拉並列法甲射手榜第1位。

Andre Silva - 23歲，效力西維爾。由AC米蘭外借至西維爾嘅Silva，今季黎到西甲表現完全解放，目前為球隊喺西甲攻入8球，排名射手榜第5位。