{ SKIP }
文:MenClub 波特先生  圖:互聯網
POSTED ON 02 Jan 2019

如果講吸金能力強嘅運動員,你可能會諗起LeBron James、C朗拿度、美斯、費達拿等體育界巨人。不過,要數真正處於吸金巔峰嘅運動員,我諗目前黎講真係非「不敗拳王」Mayweather莫屬!

2018除夕當晚,Mayweather與未曾錄得敗仗嘅日本20歲天才格鬥神童那須川天心進行一場對決,賽事以3回合拳擊例進行,每回合3分鐘,雙方用上8盎司拳套。

可能你會認為Mayweather已經年幾無進行比賽,面對年輕力壯嘅那須川天心,理論上並唔樂觀。不過,賽事卻一面倒傾向Mayweather,因為那須川天心係一名站立式格鬥選手,強項在於踢技,因此只能夠以出拳對打嘅賽事,那須川天心完全處於被動。

只係短短90秒入面,那須川天心已經被進攻型嘅Mayweather步步進迫,並多次被打中頭部而跌倒。最終,只係139秒那須川天心已經被打至暈陀陀,其教練眼見那須川天心已經難以繼續比賽,故決定丟出毛巾放棄比賽。

被打敗後,雖然敗仗唔會計入自己嘅不敗紀錄中,但那須川天心卻喺擂台上痛哭,看似接受唔到自己咁輕易被打敗。

而今場比賽,Mayweather可以話又創下吸金紀錄,佢喺短短139秒嘅比賽入面,成功獲得900萬美元嘅酬勞,亦即係每秒可以獲得接近65000美元(超過50萬港元)!要知道2017年與McGregor嘅「世紀之戰」,Mayweather就成功賺到超過1億美元嘅收益,當時佢與McGregor一共進行左10個回合,亦即係大慨30分鐘左右。

其實今次比賽,除左以拳擊賽例基本上已經完全對Mayweather有利之外,體格上Mayweather亦完全在那須川天心之上,因為那須川天心平常都只係打130磅以下嘅賽事,但今次賽事卻係要佢以137磅挑戰147磅嘅Mayweather,所以被完勝亦真係無話可說。

眼見呢場強弱懸殊、大人打細路嘅比賽,以往曾與Mayweather一戰嘅McGregor及菲律賓拳王Manny Pacquiao亦忍唔住串呢位「不敗拳王」。其中McGregor認為Mayweather為左區區900萬美元去打,實在對於佢黎講有點兒寒酸,要打就應該用佢打,因為咁樣先可以搵大錢。而Pacquiao則揶揄Mayweather今次選擇嘅對手太小了,係就應該搵好似佢或更大體格嘅對手先岩。

【推薦電影】平反暴力性侵徹查到底《爆炸性醜聞》撥亂反正 2017年的#metoo運動好大程度上改變左世界,正如近半年的社會運動完全改變香港一樣,從前和現在不再一樣,權力和慾望帶來的醜聞係唔同的時空都確實存在 ...
hobby
【推薦電影】平反暴力性侵徹查到底《爆炸性醜聞》撥亂反正 ...
12 Dec 2019
【成人花砲】日本成人飛機杯企業推出TENGA節慶花砲開心大發射 嘩!黃色經濟圈有新玩具啦,以後開派對結婚喜慶唔使再淘寶買大陸花砲,日本成人飛機杯企業TENGA推左一款全新飛機杯型的花砲,聖誕佳節送禮派對必備 ...
hobby
【成人花砲】日本成人飛機杯企業TENGA推節慶花砲開心大發射
11 Dec 2019