回看上季嘅利物浦，佢地以75分完成聯賽，排名第4位，落後最終奪得冠軍嘅曼城多達15分。可能你會覺得，今季嘅利物浦喺高普手下會變得更成熟，排名有機會更高，但都唔係咁容易估得到，佢地如今竟然可以佔據聯賽榜首，並且喺打少一場下領先第2位嘅熱刺6分及領先同樣場數嘅曼城7分！

能夠有咁出色嘅表現，當然要歸功於今季表現繼續火熱嘅沙拿，呢位埃及射手目前已經喺聯賽攻入11球，排名射手榜榜首。不過，真正令利物浦今季更上一層樓嘅，就絕對就係領隊高普。

高普究竟有咩咁勁，可以令利物浦目前以6-7分嘅優勢佔據住世界最激烈嘅英超聯賽榜首？答案就係「積極求變」！

如果你知道上季沙拿以右翼姿態，為利記全季攻入44球，帶領球隊殺入歐聯決賽，你覺得會有人敢動佢嘅位置？我諗除左高普之外，都真係無教練會願意冒改變嘅風險，因為呢個絕對係一個瘋狂嘅決定。

唔好話決定改變沙拿嘅位置，我諗真係無乜幾多個教練會去諗呢件事。最終，高普今季將沙拿變成利記嘅箭頭，而原來嘅箭頭法明奴則被拉後，成為一位進攻中場。對於呢個改變，有唔少人可能會認為浪費左法明奴喺對方禁區嘅竄擾能力，但實際卻令球隊變得更加堅實，其進攻天賦擁有更多發揮機會，特別係助攻能力，而沙拿則繼續保持高效。

有戰績支持，手下球員表現又出色，理論上真係好難去改變現況，但係高普就係勇於求變，佢唔甘願只係拎聯賽第四，佢需要球員發揮自己嘅能力達到極致，所以改變係唯一出路，改變令球員突破自己嘅Comfort Zone，令佢地變得更加全面，實力自然更加強大！

講真講就容易，但係好似高普咁將上季令唔少球隊聞風喪膽嘅攻擊鐵三角改頭換面，真係高普先做得到！