「細哨」朗拿甸奴絕對算得上係巴西足球史上最出色嘅球員之一，係唔少巴西人心目中嘅英雄。不過，對於巴西政府黎講，「細哨」可能就唔係一名非常受歡迎嘅人物，因為佢近期高調漠視巴西法律。

據最新報導指，巴西當局已經勒令朗拿甸奴、其兄弟與及經理人交出護照，以確保佢唔會離開巴西。

由於喺2007「細哨」喺巴西建設足球學校期間，對附近環境造成破壞，因此被當局喺2015年判以巨額罰款。其後，「細哨」疑似無能力償還175萬鎊嘅罰款，所以佢先後已經被當局充公左唔少資產，其中包括幾部靚車、電視機、油畫等，最後喺佢銀行戶口亦只係發現得5蚊英鎊。

其實早喺去年11月，當局已經要求充公「細哨」嘅護照，但係由於當時嘅佢身處國外，所以未能執行。不過，聖誕期間「細哨」回到巴西，所以當局立刻採取行動。

對於「細哨」嘅行為，巴西當局嘅檢察官揚言：「我們現在處理嘅情況係，一班有罪嘅團體公然喺世人面前嘲笑巴西嘅法律。」

檢察官近期再行搜查細哨嘅屋企，再發現佢家中有數部名車及一件藝術品，可見佢明顯係向巴西當局隱暪自己嘅資產。

另外，「細哨」查來亦準備出席喺杜拜舉行嘅第13屆杜拜國際體育大會，屆時朗拿度及國際足協主席都會出席。如今，「細哨」應該只能夠留喺巴西，睇下件事可以點樣拆啦。