【實用為先】丹麥Jabra Elite 85h AI智能頭戴式降噪耳機

個個都出降噪耳機，你估真係個個都識出智能降噪耳機？其實對於好多真正用家來講，來來去去得幾個大品牌予人信心，其中一個係市場穩贏好聲又實用的肯定是丹麥的Jabra，佢地去年推出的Jabra Elite 65t無論定價同功能都穩贏好多其他大品牌真無線耳機，今次佢地早於2019CES就宣佈會推出大耳機版的降噪無線耳機Elite 85h，其中一個特點是可以因應外間環境聲音情況自動調節耳機降噪模式和能力。而我地經過實際試用的確簡單方便，出來的效果也十分明顯！

另一個佢地構想的賣點是迎合近年發展的智能語音功能，支援全語音智能助手，只需要講出語入指令去可以啟動 Alexa、Siri 及 Google Assistant等。全面適應將來智能語音發展的潮流，講開呢一樣野當然希望2019年香港有粵語全面支援的語音智能助手啦。英語系國家呢方面就已經好成熟，我地還需努力。呢點Siri暫時贏一仗！

Elite 85h 外形同其他頭戴式耳機差唔多，不過丹麥的設計最大強項是人性化，85H有一定厚度的頭帶，不過一如品牌細細粒的真無線耳機咁有良好舒適的配戴體驗。同其他競爭對手唔同的是佢地的降噪功能是主動性因應環境自動調節。佢有內置的「SmartSound」功能，利用AI智能技術因應環境自動切換 Commute、In Public 及 In Private 模式，保證唔同環境和時間都可以自動適應你身邊情況。只要連接用SmartSound+ apps，我地實試證明從一個靜的環境走到繁忙的地鐵，大約30秒到就自動從Commute 跳去 In Public或兩者之間跳動，非常之準確，而且Jabra整個耳機的設計都好人性化同方便，耳機無咩按制也不具開關但其實摺起耳機即自動關機，將耳機從頸上按到電話響帶上頭即自動接聽，一切設計都以人為本。不花巧夠實際就是我多年來對Jabra真實感受，當然也由於太實際，Jabra一向都是功能性耳機，而不是音響型音質耳機，如果講音效，Jabra還依然給人一種好聲但唔好聽的功能性感覺，想要做音樂達人追求入耳靚聲，對不起，只合格有餘。

佢最強大有用是通話能力，作為無線耳機用家，原來簡簡單單係任何場合接或打個電話並非必然，用過很多耳機都不是太好，尤其在多人的地鐵或搭車當中，Jabra Elite 85h機仔細細有8組Mic收音，其中四個用於功能強大的數碼ANC，以消除環境噪音。整個通話試用感覺順暢穩定雙方通透清晰。

Elite 85h的續航力達到36小時，假如關閉ANC，更可用到41小時。咁強大的表現係值得加分讚賞。Elite 85h 已全面上市，價格只是港幣 2,339 元，對比其他同價以下的對手，個人認為無得輸，比佢更貴的對手只是音樂性上的比較，功能同應用能力上Jabra都幾領先群雄。