韋達，相信唔少即使無賭馬嘅朋友都一定聽過佢個名，因為佢可以話係香港歷史最強嘅騎師之一。不過，韋達即將結束其騎師生涯，並轉任練馬師繼續賽馬工作。

今日較早時間，馬會發佈一則消息，就係今年2月10日(年初六)嘅賽事將會係韋達最後一場作為騎師策騎嘅賽事，並向其發出練馬師牌照。而初六嘅賽事完結後，韋達將會結束騎師生涯，並展開其練馬師生涯。

現年46歲嘅韋達，在1996-97季度來港履行短期騎師合約，其後一季佢正式留喺香港長期策騎，並成為首位贏得1000場頭馬嘅騎師。而黎到今日，韋達已經累積贏得1804場頭馬，係香港賽馬歷史第一，同時累積獎金亦高達15億港元，同樣係歷史第一。

個人榮譽方面，韋達喺2000/01季度至2012/13季度期間，連續13年奪得香港冠軍騎師寶座，直到2013/14季度先被潘頓打破其壟斷。

唔再做騎師而轉做練馬師後，韋達將需要重新學習，佢將到世界唔同地區跟隨知名練馬師學習練馬技巧，其後才返回香港設廄從練，並為新馬季做好準備。