數數算算，原來一年容易又過年，下星期開始就是賀歲片的檔期，好多朋友包括我本人都對於賀歲片的質素和內容有少少保留。因為過年過節傳統上是合家歡講意頭，只需要一大班人開開心心胡胡鬧鬧拜個年就算。因此，都相當多粗製濫造的過年電影。不過另一邊廂，賀歲片好搵，簡單快捷，去年全年最高票房的港產電影正正是賀歲檔期的《棟篤特工》。證明賀歲片較易搶高票房。今年，本地都有幾套賀歲片同時上映，如果你問我會選擇那一套作品，邊一套上映港產大作是好我真的不知道，唯獨你問我要挑一套入場睇，第一時間的回覆是《恭喜八婆》，原因好簡單，本年港產賀歲片能融入本地生活和社會的，從預告看來，只得《恭喜八婆》。

預告：

當然，電影的世界太屬世可能並非好事，如果你想跳離本港，投入另一些星影虛幻的世界中，閣下自然可以有其他選擇，但想要開心，關心本地，活在當下，識得笑又有劇情貼地有趣，可以睇睇彭浩翔這次這部喜劇的作品，一部吸引人的喜劇首先要劇情上一聽就覺得有得唸，幾過癮先，其他的都是後話，恭喜八婆有我地生活化的笑料元素。起碼大家都應有過電話聊天群組的經驗，有一班朋友組成的群組，也有沉左底久未發言的沉底群組，劇情就來自一班各有心刺分散的舊友再加上一單「糟事」，即劇情中所謂的『人奶』事件，劇情就是胡鬧地要下班前搵一枝「人奶」回來頂包錯誤用了的那那一枝。過程和笑料，我鬼知，入場睇再算，但故事的開始好生活化，一個辦公室總會搵到一兩個結左婚要餵人奶的女士。然後總有一班老友或唔同的群組，因著唔同的事互相幫忙和支撐，通常愈是「糟」事奇事怪事，老友愈幫忙，這就是人生。搵枝人奶呢種事，幾有趣，起碼唔係內地阿媽急住要錢做手術之流。

製作花絮

如今世代睇返屬於自己聽得明的故事主題故事，原來已經不是易事，見到「任何仁」出現，我識笑，你唔識笑仲問我「這甚麼玩意兒」！已經夠我笑，我就喜歡這種感覺，咁簡單仲需要我多作介紹？再深入就應該搵彭浩翔送我幾個張飛全家入場啦！不過……買飛入場支持港產片啦衰鬼！！

恭喜八婆
MISS BEHAVIOR

導演 :彭浩翔

演員 :梁詠琪、梁洛施、陳靜、谷祖琳、林兆霞、陳逸寧、謝賢、邵音音、徐天祐、陳奐仁、郭奕芯、楊柳青、丁可欣

片長 :1小時30

分級別 :IIB 級

語言 :粵語 (中英文字幕)

上映 :31.1.2019 (公映)