西班牙國王盃八強首回合，西維爾主場面對巴塞隆拿，憑住沙拉比亞及賓耶達各入一球，西維爾以2:0擊敗呢支沒有美斯等數名主力嘅巴塞。而喺賓耶達入球之後，其一個舉動令世人動容。

賓耶達喺比賽76分鐘入球後，拉起自己嘅球衣，原來佢入面仲有一件底衫，上面仲寫住一啲字句：「這個入球是獻給你，我的兄弟，堅強起來，Sala！」

睇見呢段文字都真係好令人感動，我波特先生都真係想喊出黎。尋日起因為轉會加盟卡迪夫城嘅阿根廷射手Sala，其飛去卡城嘅飛機突然失去聯絡，再加上其流傳出嘅錄音都透露飛機可能已經喺空中解體，飛機上嘅人包括Sala生存嘅機會應該相當渺茫。如今已經相隔一日，生還嘅機會真係接近零，除非真係有奇蹟出現。

賓耶達與Sala一樣都係喺2010年加入法甲的，二人亦都係射手，所以可以話係惺惺相惜。二人其後各自繼續發展，Sala憑住出色嘅入球能力被卡城睇中，以1700萬鎊轉投，而賓耶達則喺2016年加入西維爾。