由河本焰擔任原作，尚村透作畫嘅賭博題材日本漫畫作品《狂賭之淵》講述私立百花王學園係一間存在階級制度嘅學校，佢哋以學生會為頂點，成間學校受到「賭博」支配，贏嘅話就係天堂，輸嘅話就係地獄，賭博強者受人羨慕、弱者被人凌虐，而轉校生「蛇喰夢子」嘅加入，就令局勢起咗好大變化……

而《狂賭之淵》真人版日劇第一季其實早喺2018年1月起就已經於MBS電視台製作嘅Dramaism播出，導演為英勉，而蛇喰夢子由濱邊美波飾演，鈴井涼太則由高杉真宙飾演。由於《狂賭之淵》題材特別、故事吸引，加上演員嘅顏藝相當出色，所以即使係真人版，都受到觀眾熱烈讚賞，唔少人都相當期待第二季開播。

官方最近就同大家確認，《狂賭之淵》真人版日劇第二季將於4月2日開播，第二季嘅主題曲《mummy mummy》繼續由前一季嘅搖滾樂團「BIGMAMA」負責，真係好想快啲睇呀！