英超目前已經進行至第24週，冠軍預計將會係利物浦及曼城之爭，其中喺較早前曼城擊敗利物浦後，形勢變得更加緊湊。不過，以為曼城會繼續高歌猛進威脅利記之時，佢地竟然大意失荊州，以1:2不敵處於護級區嘅紐卡素，令利記喺打少一場之下仍然領先4分之多。

本來今週曼城好有機會將差距進一步收窄，除左因為佢地面對嘅對手只係紐卡素，利記面對嘅係曾經擊敗車路士及曼城嘅李斯特城，因此只要曼城贏利記輸的話，曼城就會追至1分之差。但可惜哥迪奧拿卻事與願違，爆冷落敗。

對於先領先嘅情況下，曼城竟然分別喺下半場66分鐘及80分鐘連失兩球，最終無力回天，領隊哥迪奧拿坐喺後備席仍非常無奈，可以見到佢嘅表情係有幾咁失望。

另一邊廂嘅利物浦相信見到曼城輸波一定開心到飛起，因為只要佢地今日能夠擊敗李斯特城，咁佢地嘅領先優勢將會再次擴大至7分，而喺聯賽仲有14輪嘅情況下，7分唔係一定話你贏硬冠軍，但就絕對係一個巨大嘅優勢，只要保持穩定嘅狀態，利記絕對有機會贏下首個英超冠軍。