Lego從來都唔係玩具咁簡單，識得玩，你仲可以砌出藝術作品！就好似荷蘭 LEGO 玩家 koffiemoc咁，佢早前就以日本浮世繪畫家「葛飾北齋」嘅經典作品《神奈川沖浪裏》為題材，用Lego將呢個經典2D作品變成3D藝術品，令唔少網民非常驚訝，紛紛表示希望可以推上Lego Ieas，成為真正嘅官方商品！

《神奈川沖浪裏》係日本浮世繪畫家「葛飾北齋」嘅著名木版畫，於1832年出版，描繪巨浪下嘅漁船，並以富士山為背景。koffiemoc喺自己嘅flickr相簿表示，先前見好多玩家都有類似相法，以Lego重現《神奈川沖浪裏》，不過幾乎都係以2D方式呈現，於是佢就決心製作一款3D立體化版本，無論係富士山、海浪，定係小船，每一個細節都鉅細無遺，的確好神！