最近最引起話題嘅迪士尼動畫電影一定係《Toy Story4》，只不過其實除咗《Toy Story4》之外，萌爆嘅《優獸大都會》都有爆出最新消息，有傳《優獸大都會》嚟緊將會連續推出兩部續集，仲會落成3億美元製作費！

《優獸大都會》係美國華特迪士尼動畫工作室製作、並由華特迪士尼影業所發行嘅3D電腦動畫動作喜劇冒險電影，佢講述喺一個只有人類以外嘅哺乳動物所居住嘅大城市中，主角兔子女警朱迪同一隻街頭行騙高手狐狸阿力合作，解開一樁肉食動物失蹤案，並揭發其背後陰謀。《優獸大都會》上映之後，喺好多國家同地區都創下當地嘅票房紀錄，其總票房收入更於2016年6月5日突破咗10億美元。而《優獸大都會》亦獲得許多榮譽，包括金球獎、評論家選擇獎、安妮獎以及奧斯卡最佳動畫片獎等等。

《優獸大都會》之前一直未有透露新消息，直到電影中其中一位配音員Tommy Lister爆出，正同迪士尼籌畫《優獸大都會》嘅續集，先知呢個大Project正在進行中。Tommy Lister最近接受blogmickey.com訪問時，就話《優獸大都會2》係迪士尼目前正在進行嘅最大Project之一，今次淨係製作成本，未包廣告費用，就用成3億美元！

而之前外媒推估《優獸大都會》預算係1億5000萬美元，咁今次用成3億美元製作費，照計應該就係連續推出兩部續集，不過現階段所有嘢都仲係推測緊，一切都仲要等官方公布。