獨行俠新秀探花Luka Doncic可以話已經成為今屆NBA最炙手可熱嘅超級新秀，其場均可以交出20.8分7籃板5.5助攻1.1抄截，可以將今屆其餘所有新秀全部比下去，即使話佢已經接近達到全明星級別亦都不為過。

而實際上Doncic其實並唔係效力獨行俠的，因為原來擁有探花簽嘅係鷹隊，而佢地選上Doncic之後決定進行交易，佢地將Doncic交易至獨行俠，以此換來Trae Young及一個2019年受保護首輪選秀權。

對於鷹隊啟動以上呢個交易，有唔少鷹隊球迷已經開始質疑，因為Doncic嘅表現實在太大，但其實亦都唔難理解鷹隊呢個決定。首先，送走Doncic換來嘅2019年首輪選秀權係非常有價值的，要知道今年夏天有多位天才球員將會參加NBA選秀大會，其中包括令各隊垂涎嘅Zion Willamson，仲有佢嘅隊友RJ Barrett、Cameron Reddish、Tre Jones，另外Ja Morant、Rui Hachimura、KZ Okpala等亦都係擁有巨大潛力，所以擁有更多嘅首輪選秀權將令佢地有更大機會獲得呢啲天才。

而除左呢個價值不低嘅選秀權之外，Trae Young亦都係一位擁有巨大潛力嘅球員。雖然目前黎睇，佢嘅表現比唔上Doncic，但佢嘅表現因為慢慢適應後已經逐步攀升。由去年11月起，Young嘅每月場均得分有升無減，14分＞15.8分＞18.7分＞19.5分，三分球命中率亦由11月嘅19.8%大幅回升至本月嘅44.7％，可想而知佢正不斷進步。

有唔少人喺Young加入NBA前已經預計佢會係第二個Stephen Curry，雖然岩岩加盟後有啲水土不服而被質疑係水貨，但如今佢已經證明自己真係有成為下一個Curry嘅能力。首先，Young成功將不必要嘅失誤減少，其後佢改善自己嘅出手選擇，從而增加自己嘅命中率。其實Young嘅特點同Curry非常相似，特別係控球後投射三分球嘅能力及投射速度，並唔係很多球員能夠做到的。

雖然Doncic確實非常搶眼，但實際上獨行俠都只係排在西岸嘅第11位，距離季後實資格仍然有唔少距離；另一邊廂嘅鷹隊戰績可能無獨行俠好，但都排在東岸第12位，情況並唔係差太遠。因此，如果鷹隊今年夏天能夠幸運地獲得一個更前順位嘅選秀權，咁樣佢地就有機會可以組建一套實力更強、天賦更高嘅陣容。屆時唔知球迷仲會唔會覺得當日鷹隊嘅決定係錯嘅呢？