今日速龍主場迎戰籃網，憑住Kawhi Leonard個人轟下30分，再加上攻入最後嘅致勝擦板球，速龍以127:125險勝對手，與東岸第一嘅公鹿只係差1場勝差。不過，就喺呢場比賽前卻發生搞笑嘅一幕，令新加盟嘅Marc Gasol有點兒「老尷」。

較早前，速龍透過交易成功換來明星中鋒Marc Gasol，球隊內線及拉闊空間嘅能力因此得而提升，爭奪東岸冠軍，甚至總冠軍亦都唔係無可能。

不過，對於新加盟嘅Gasol黎講，可能仲需要啲時間黎適應，特別係新球隊嘅文化。好似今日呢場比賽，就係Gasol第一次喺速龍主場登場嘅賽事，但唔知係咪唔記得提前通知佢，佢喺賽前介紹球員嘅環節，最後介紹核心Kyle Lowry嘅時候，全隊球員衝出去球場上，有啲扒喺地，有啲訓係度手腳亂動，情況猶如邪教儀式一樣，唯一嘅局外人就係Gasol。只見Gasol呆呆咁企喺度，最後與Lowry擊掌完事。雖然係咁，但Gasol亦向隊友們比手勢，貌似表示自己將會學懂球隊嘅文化。

雖然暫時Gasol仍然未融入球員們嘅文化，但係佢對於球隊嘅作用卻非常明顯，好似今日佢就以後備身份取得16分6籃板，包括喺關鍵嘅第四節接連得分，最終助球隊取得勝利。