運動紀念品一向有價有市，好似球星簽名球衣、簽名足球籃球、用過嘅件品等等，其中球星卡亦都係其中之一，而近日一張NBA傳奇「籃球之神」Michael Jordan嘅籃球卡就喺ebay以$350,100美元完成交易！

你無睇錯，Jordan呢張卡係以$350,100美元，亦即係＄2,747,714港元成功拍賣出去，真係可能多過你間屋嘅首期。

今次呢張Jordna嘅卡，係一張1997年Skybox出品嘅卡，人稱「綠寶」嘅卡全球僅限量10張，5年前曾有人出價8萬美元收購呢張卡，但當時擁有者拒絕交易，估唔到相隔幾年後呢張卡嘅價值竟然升值4倍幾，實在令人驚訝。

講番今次拍賣，卡嘅底價只係99美分，去到最後1日叫價已經去到10萬美元，拍賣最後2分鐘價錢由20萬美元升到35萬美元，最終經過130口嘅叫價後，以$350,100美元成交。

今次卡牌完成交易後，成功刷新Jordan嘅卡牌出售紀錄，但今次紀錄亦只能夠排名籃球卡牌嘅歷史第三位，而排名前兩位嘅卡牌分別係2016年成交嘅Jabbar($501,000美元)及2015年成交嘅George Mikan($403,664美元)，而僅隨Jordan其後嘅則有LeBron James嘅新秀簽名卡。