「紅魔鬼」曼聯近期喺蘇斯克查領軍下表現出色，今季要爭前四仍然大有機會。不過，目前更令球迷關注嘅可能係門將迪基亞嘅續約，而雙方嘅談判正陷入膠著嘅狀態。

對於狀態出色，多次為曼聯化險為夷嘅迪基亞黎講，佢本人係想續約為曼聯效力的，但條件係球隊要為佢開出一份全隊最高薪嘅合同，亦即係話要與目前球隊第一高薪嘅球員山齊士嘅人工持平，後者目前週薪為40萬鎊，最高則可以達到50萬鎊。

不過，最新嘅消息指曼聯副主席活華特已經拒絕迪基亞嘅要求，即使對方可能係球隊最出色嘅球員，同時一眾球迷亦都覺得曼聯絕對要滿足迪基亞嘅要求。而曼聯亦都已經被告知，如果迪基亞開出嘅條件被拒絕，佢將肯定會離開球隊。

面對可能失去迪基亞嘅前提下，活華特仍然堅持拒絕滿足對方嘅要求，係因為佢被之前簽下山齊士時嚇怕，佢唔想再重蹈覆轍犯下相同嘅錯誤，呢個錯誤令球隊在更衣室中做產生摩擦。

不過，明顯迪基亞嘅情況與當日簽下山齊士完全不同，迪基亞已經完全展示自己嘅能力，及為球隊帶來巨大嘅幫助。好難想像如果曼聯失去迪基亞後，失球數字會增加多少。

另一方面，門將嘅價值近期明顯提升不少，就好似利物浦以6250萬歐元簽下艾里臣，而車路士則更以8000萬歐元簽下Kepa，因此表現極好嘅迪基亞當然價值不菲。如果曼聯真係唔願意為迪基亞開出滿意嘅合同，預計擁有無限金錢嘅巴黎聖日耳門將好大機會搶人，特別係佢地嘅門將保方好可能會好快退役。