湖人今季可以話係如願以償終於成功簽下自Kobe Bryant後嘅第一位超級巨星 - LeBron James，呢位曾三奪總冠軍嘅球星確實帶比湖人更多聚光燈，但戰績卻並未有如預期般大幅改善，排名西岸第11嘅湖人，與西岸第8嘅球隊相差多達7.5場勝差，因此佢地將好大機會再一次無緣季後賽。

無錯，曾帶領騎士及熱火統治東岸，連續8年打入NBA總決賽嘅LeBron James，黎到西岸就好似完全喪失其統治力，單憑佢嘅一己之力竟然連季後賽都入唔到。當然你可以歸咎於球隊傷病問題，以及LeBron自身亦有傷在身，但其影響力已經明顯下降不少。

除左無力帶領湖人在戰績上有所改善，LeBron嘅到來亦大幅壓縮球隊年輕球員嘅成長，因為只要LeBron在場上，基本上球權都會落喺佢度，間接削弱湖人嘅未來。

對於無力即時改善湖人戰績，同時又削弱球隊嘅未來，有指作為湖人擁有人嘅Buss就曾想將LeBron交易掉，亦即係說明球隊已經對LeBron帶隊失去信心。另外，有指如今交易LeBron James湖人能夠換回嘅籌碼實在低上不少，有西岸嘅球隊表示只係願意出一個受保護首輪選秀權去換LeBron。

另外，亦有球隊表示想得到James，但並唔會願意付出自己隊內最好嘅球員，佢亦認為如今嘅James已經無力獨力帶隊奪冠，特別係喺西岸，佢需要有其他球星與佢拍檔先有作為。經歷左呢大半個球季，LeBron James好似已經見底，佢已經唔再係以往個位NBA第一人，相比一年前嘅交易價值，如今嘅LeBron實在低得可憐。

唔知作為湖人迷嘅你，會願意繼續見到James留隊？定還是用佢換回湖人未來呢？