《PSYCHO-PASS心靈判官》（日語：PSYCHO-PASS サイコパス）係Production I.G所製作嘅電視動畫系列，故事原案為虛淵玄，角色原案為天野明，並由鹽谷直義同埋本廣克行指導製作。第一季動畫於2012年10月至2013年3月間喺富士電視台嘅節目noitaminA中正式播映，而第二季則於2014年10月9日開播。

《PSYCHO-PASS心靈判官》嘅故事係發生於一個處於獨裁狀態嘅反烏托邦未來社會，無處不在嘅監視器會不斷掃描每一個經過嘅市民嘅精神狀態，監視器收集被掃描者嘅現有心理狀態同埋個性傾向，並將其數值化，以此衡量市民犯罪嘅可能性。該「數值」喺劇中一般稱為Psycho-Pass（心靈指數）。當監視器檢測到過高嘅心靈指數時，則會通知厚生省當局派遣轄下嘅公安局人員處理。公安局嘅刑警都配有一枝特殊手槍——「主宰者」，用以擊發指數過高嘅人，並根據指數過高者嘅心靈指數自動切換成麻醉槍或分解槍。

而近日官方就正式宣布TV動畫第三季製作決定！前兩季基本上都可以視為係監視官「常守朱」嘅成長史，而第三季動畫雖然未知故事內容，但目前就知道包括「狡囓慎也」等等前兩季嘅角色都會再次登場，而新視覺圖中嘅兩位主角分別係「慎導灼」（CV：梶裕貴）以及「炯・米哈伊爾・伊格納托夫」（炯・ミハイル・イグナトフ，CV：中村悠一）。至於監督依舊由塩谷直義負責，天野明擔當角色原案。