輪休對於現今嘅球隊黎講可以話一啲都唔陌生，為保球員喺常規賽無咁易受傷，唔少球隊都會久唔久就安排隊中主力休戰，從而保存體力至季後賽，而其中馬刺教練Gregg Popovich更加係NBA嘅輪休大師。不過對於睇慣90年代NBA嘅球迷，輪休絕對係罕見的，而Kobe Bryant日前亦對此作出評價！

對於輪休呢個話題，Kobe直言：「我唔會輪休的。我只有喺我完全行唔到嘅時候，我先會休戰。我想講嘅係，一個球員嘅生涯其實好短，所以唔好錯過任何一個Moment！另外，你再諗下一班球迷，佢地可能一個賽季就只有一次機會現場睇你嘅比賽，可能存左好耐錢先入到場睇，所以如果你仲可以行，你就上場交出你嘅表現！」

Kobe當年絕對係身體力行咁盡全力上場，最經典莫過於佢2013年ACL斷裂，但佢竟然仲要完成罰球先下場，基本上當時嘅佢應該係痛到接近行唔到的了。所以Kobe嘅想法絕對會贏得一眾球迷嘅掌聲，因為要入場睇NBA嘅比賽並唔容易，除左部份門票收費昂貴，而作客嘅球隊黎到你所屬嘅城市更加一年只有1-2次嘅機會，所以如果咁岩班主力輪休，球迷真係會喊出黎！

另外，Kobe亦再次確認自己對NBA歷史最偉大球員嘅睇法，佢堅信NBA歷史最偉大嘅球員需要以總冠軍數黎界定，所以喺Kobe心目中塞爾特人傳奇Bill Russell先係NBA歷史最偉大嘅球員。Kobe覺得，喺每個人嘅心目中都有自己認為最好嘅球員，你可能會覺得係Michael Jordan，佢可能會覺得係O’neal、Jabbar、Magic等等，但喺NBA入面贏得總冠軍先係最重要，而球員生涯一共贏得11次總冠軍嘅「指環王」就係NBA歷史贏得最多總冠軍嘅球員，因此Kobe覺得佢先係NBA最偉大嘅球員。

Kobe堅持呢個講法係可以理解的，但同時亦都有漏洞，就好似Robert Horry拎左7冠，唔通佢會比6冠嘅Jordan更偉大？當然，Kobe呢個講法可以令擁有5冠軍嘅自己地位穩上不少，其中好似LeBron James、Dwyane Wade、O’neal等球星都難以超越佢。

唔知大家又對Kobe呢個講法有幾支持呢？