尋晚西甲賽事皇馬主場迎戰韋斯卡，憑住伊斯高、施巴路斯及賓施馬各入一球，特別係賓施馬臨完場前嘅絕殺，皇馬成功以3:2險勝對手，全取三分。雖然皇馬最終都成功獲得勝利，但係其中一個焦點落喺正選門將身上，因為今仗皇馬嘅正選門將係領隊施丹嘅兒子盧卡施丹。

對於用上自己嘅兒子盧卡，外界有唔少聲音都覺得施丹用人唯親，甚至覺得佢而家大權在握鍾意用邊個就用邊個，就算功臣拿華斯都被放於後備席。不過，施丹就拒絕呢種說話，並認為盧卡係有實力去成為皇馬嘅正選門將。

當然，施丹亦都唔係毫無理據的，佢表示今仗盧卡能夠擔任正選，除左佢真係有實力之外，佢喺訓練期間表現成功搏得關注，而再加上高圖爾斯受傷，拿華斯又岩岩出戰完國家隊賽事，所以施丹想比佢休息，因此作為球隊第三門將嘅盧卡就獲得生涯首次喺皇馬主場班拿貝球場上陣嘅機會。

雖然最終皇馬失左兩球，但係盧卡施丹嘅表現亦都唔算差，特別係佢嘅視野不錯，其中一球佢沒收對方進攻嘅球後，隨即大腳斬至前場發動快攻，其大腳嘅準絕度可見一班。

而施丹過去執教皇馬取得嘅成功，一大原因係佢非常善於輪換。就以今次為例，佢敢於起用自己嘅兒子替代岩岩踢完國家隊賽事嘅拿華斯，對於要面對外界輿論壓力一啲都唔容易，而正正係因為佢嘅膽量，相信皇馬下季應該會真係有翻睇頭！