去年除夕之夜，香港拳擊代表潘啟情Raymond出戰「Lifetime Boxing Fights」，與泰國拳手上台對戰，最終喺第3局就以TKO擊敗對手，成功贏得WBC輕蠅量級(108磅)青年國際洲際冠軍，同時衛冕WBC ABCO輕蠅量級亞洲洲際冠軍及ABF輕蠅量級亞洲冠軍。

目前戰績為7勝1負4KOs嘅Raymond，當然唔會止步於之前嘅勝利，佢嘅下一戰已經決定，就係5月12日將會喺灣仔會展迎戰WBA中國青年拳王李翔(6-2-1, 2KOs)，力求爭奪香港首個職業拳擊世青冠軍 - WBO輕蠅量級世界青年金腰帶。

出道4年嘅Raymond，自出道以來一直都以世青金腰帶作為目標，而就喺24歲年齡之限前，佢終於獲得爭奪WBO輕蠅量級世界青年金腰帶嘅機會。而為左準備今次賽事，Raymond更加飛往菲律賓進行為期兩個月嘅特訓，務求無悔挑戰自己嘅目標。

對於今次賽事，Raymond難掩興奮心情，佢知道要獲得呢次挑戰嘅機會並唔容易，所以非常想多謝自己背後嘅團隊，而佢揚言會傾盡全力，將呢條金腰帶留喺香港！

而作為Raymond嘅對手，李翔只有20歲，係中國嘅新晉拳手。2017年先出道嘅佢，短短一年就打出名堂，去年9月就成功登上中國區最輕量級青年拳王寶座，實力不容忽視。