勇士今季原無意外，應該好大機會可以再次成為西岸一哥，而坐擁5星戰將嘅佢地亦都係今年總冠軍嘅頂頭大熱，佢地將好大機會可以達成三連霸嘅霸業。不過，即使佢地今年真係成功達成三連霸，今夏佢地亦都要面對正選陣容拆夥嘅危機，特別係兩屆總決賽MVP Kevin Durant離開嘅機會最大。

如果你有留意傳聞，KD今夏離開勇士嘅消息絕對不少，而有傳佢可能會連同Kyrie Irving一齊加盟處於東岸大城市嘅紐約人，後者喺Porzingis被交易後，球隊陣中正欠缺一位星級球員。

而有媒體分析指，大家其實唔使再估今夏KD會唔會離開勇士，因為KD離隊基本已成定局。離隊嘅原因其實好明顯，雖然KD過去兩年都為勇士帶黎總冠軍，並且成為總決賽MVP，但佢一直未有獲得勇士球迷應有嘅重視，即使勇士球迷感謝KD為佢地帶黎總冠軍，但係勇士依然係Stephen Curry嘅球隊，其次係Klay Thompson及Draymond Green。

而如果KD想進一步建立自己嘅名聲及地位，佢就需要離開勇士，加入欠缺巨星嘅紐約人將令其地位提升，因為紐約人嘅球迷一定會爭相支持佢，再加上紐約人非常需要好似KD咁嘅巨星去幫佢地重新建立球隊，所以預計球隊一定會喺佢身上花上唔少資源為佢打造巨星形象。

另外，KD轉戰東岸預計其實力可以幫助球隊打入季後賽，甚至帶隊殺入總決賽，即使唔能夠奪得總冠軍，其身份地位都一定會比留喺勇士更好，而如果Irving又真係一齊加入紐約人嘅話，聯手挑戰總冠軍亦都唔係夢。