2018世界盃，冠軍法國隊嘅表現雖然唔算得上非常亮眼，但陣中球員個個天賦極高，其中只有20歲嘅麥巴比就更加已經成為巨星，潛力上限未見頂，絕對係未來球王嘅大熱門。

而日前，未來球王候選麥巴比就有機會同巴西球王比利同場見面，後者作為前輩亦非常睇好呢位年輕球員，並直言睇見麥巴比就令佢想起好多以前嘅球星。

另外，麥巴比又話：「比利同我講叫我下屆世界盃比巴西贏，但係我同佢講呢樣係無可能的，因為我要想接近佢就要贏世界盃，我係一個擁有野心的人，鍾意接受挑戰。」

麥巴比又盛讚比利成就：「比利高於所有球員，他是帝王，喺歷史中就只會有一個好似佢咁嘅人。佢係代表人物、係傳奇、係活著嘅歷史。」

比利作為足球界嘅頂點，麥巴比仰望佢絕對係合理的，但係麥巴比正挑戰著一切可能性，只有20歲嘅佢已經奪得世界盃，球會方面如果計歐洲賽事成就暫時未算太高，但單計法甲佢已經係達到統治級別了。未來再創更多成就，絕對係指日可待，屆時挑戰比利嘅球王地位亦未必係夢。