歐聯八強尋晚到祖雲達斯登場，其中佢地作客面對青春班阿積士，後者可以話係今屆歐聯嘅黑馬，佢地嘅表現實在令人眼前一亮，所以即使祖記擁有C朗拿度亦不一定可以全身而退。

而比賽節奏果然落入主場嘅阿積士腳下，佢地嘅前場迫搶令祖記陷入被動，並不斷喺祖記禁區製造威脅，幸門將施捷斯尼表現出色，加上阿積士球員多次射門亦都未能中龍。

相反，祖記喺上半場即將完結前，憑住一次右路反擊，C朗一次精妙跑友，成功接應隊友嘅傳中球後插水式飛頂，雖然阿積士門將都叫拍到個波，但個波仍然飛入網內。就係咁，祖記帶住1:0嘅領先優勢進入更衣室。

不過下半場一翻黎，阿積士就憑住大衛拿尼斯閃電追平，呢位7號仔喺祖記禁區如入無人之境，首先Cup過簡些路，然後順勢腳內檔Curve向遠柱，施捷斯尼反應唔切個波直飛網仔入。

追成1:1平手後，阿積士仍然壓住祖記黎打，但佢地卻未能夠創造入波嘅機會，最終雙方踢成1:1平手。下仗將會喺祖記主場進行次回合，而祖記將擁有作客入球優勢。不過，千祈唔好唔記得阿積士擁有16強作客逆轉皇馬嘅戰績，所以祖記絕對唔可以掉以輕心。