PIXAR製作嘅《怪獸公司》喺全世界都擁有極高人氣，即使係前傳《怪獸大學》都絕無失威，一樣咁好睇！而最近就傳出新消息，話PIXAR有意推出《怪獸公司》續集影集《Monsters at Work（暫譯）》！

據聞《Monsters at Work（暫譯）》故事設定喺《怪獸公司》故事嘅六個月之後，怪獸公司改用小朋友嘅歡笑嚟發電，而其中一個充滿才華嘅技工Tylor Tuskmon (Ben Feldman配音)，就夢想自己可以同毛以及大眼仔米高喺同一層樓一齊工作，睇嚟續集將會環繞呢三個人物之間嘅故事。另外毛毛同大眼仔米高嘅配音員將會沿用Billy Crystal及John Goodman等原班人馬。而《Monsters at Work》預計會於2020年上畫。