歐聯八強次回合，巴塞重返主場迎戰曼聯。落後一球嘅曼聯背水一戰出動埋最後的皇牌 - 費Sir，希望有佢作幕後軍師可以為曼聯起死回生。可惜嘅係巴塞有美斯，曼聯基本上全場被壓住打，最終主隊憑住美斯個人梅開二度，加上古天奴嘅入波，最終3:0擊敗曼聯，兩回合計4:0大勝晉身四強！

面對落後一球仲要作客嘅絕境下，曼聯當然想盡快扳回一涎，但可惜喺魯營球場嘅美斯之下，一切都只能夠變成空談。美斯今場唔單止進攻恐佈，連防守亦非常積極，佢嘅兩個入球都係喺前場進行迫搶後製造的，當然第二個入球係曼聯門神迪基亞漏入送的，唔知佢心入面會唔會覺得自己好丟臉、好錯、好討厭，好嘔心，好陌生，同埋有啲對唔住紅魔呢？

而喺美斯攻入兩個入球後，巴塞並未有放軟手腳，進攻繼續相當凶猛，令曼聯禁區大受壓力，但幸而最終並未有再多失球。

不過去到下半場，情況並未有太大改變，並在比賽60分鐘古天奴射出一記世界波，再一次收死迪基亞。兩回合計領先至4:0嘅巴塞，基本上都已經成功將比賽雪入雪櫃。最終球證雞聲一響，巴塞主場3:0擊敗曼聯，兩回合計4:0安心晉身四強！

另一邊廂，祖雲達斯雖然有C朗拿度率先取得入球，但其後球隊卻被阿積士連入兩球，最終兩回合計2:3出局，而晉級嘅阿積士可以話係今屆賽事最大嘅黑馬，究竟佢地最終可以走到幾遠呢？