尋晚一場本來唔係有太多球迷注視嘅英超賽事：屈福對vs修咸頓，卻因為一個入球成功受到所有人的關注，甚至足以載入英超歷史。

比賽如平日一樣由屈福特球員喺中圈開波，然後佢地將個波傳比除門將外處於最後嘅後衛Cathcart，而Cathcart亦應該與大部份時間一樣，想將個波大腳斬向前。但係勢估唔到，修咸頓前鋒朗治卻已經跑到其前方嘗試迫搶，並成功跳起閂到Cathcart嘅長傳。

朗治唔單止成功閂到個波，仲要好好彩個波彈正喺佢前面，佢一轉身已經可以超過Cathcart，並半單刀面對門將，最終輕鬆挑射笠死門將。由開波到朗治入波，整個過程只係短短7.69秒，呢個時間令朗治成功打破英超最快入球紀錄。

據英超數據顯示，喺朗治之前嘅英超最快入球紀錄由前熱刺中堅京治所創造的，當時佢只係用左9.82秒就成功取得入球。