作為年輕嘅球迷，布雷西亞呢支球隊你可能唔會太熟悉，但有番咁上下資歷嘅球迷部份就會非常鍾意呢支球隊，原因係當年嘅一位球員 - 巴治奧。不過自從巴治奧離隊後，布雷西亞近年狀況都令人失望，一直於意乙徘徊。

不過，今季征戰意乙嘅布雷西亞表現神勇，仲喺岩岩一週嘅聯賽1:0擊敗阿斯高利，積分高達66分，排名聯賽第一，比第三位嘅巴勒莫多出7分，所以提前鎖定一個升上意甲嘅資格。而同時由於布雷西亞喺打少一場嘅情況下領先第二位嘅萊切3分，所以佢地好大機會可以奪得今屆意乙嘅冠軍！

今次成功奪得升班資格，對於布雷西亞黎講意義非常重大，因為佢地自從2011-12球季降班到意乙後，一直無升無降，相隔8個球季後佢地終於再次升上意甲。

過去，布雷西亞曾分別奪得2次意乙冠軍及3次意丙冠軍，另外亦都拎過1次意大利盃。

想當年，已經成名已久嘅巴治奧喺生涯晚期選擇加盟布雷西亞，並效力左4年時間。雖然當時嘅巴治奧已經處於黃昏期，但佢亦為球隊上陣左101場比賽，並貢獻左46個入球。