6月將至，避走《復仇者聯盟4》的各方影片統統回歸。電影業又回到從前熱鬧多變，票房就肯定不會保持強盛，但唔同的電影有機會推陳出新，當中有一套一看就覺得要和大家分享推薦的港產猛片，無錯就是本地爛片大王王晶最新誠意大作《追龍2》，王晶的電影好多朋友一聽就冷笑或甚至有爆粗相待，不過你咪理，票房反映一切。如果我話王晶其實是香港其中一個非常有料的電影人，唔知大家同意否，我真心認同王晶的才華，但唔認同佢個人，我唔認識佢唔敢講佢私人野，但佢出品的電影相當之雜，我認為8成是「求其」或「看不起」觀眾的劣作，但也有一些佳作去證明自己實力，對上一部個人認為是佳作的是王晶的《追龍》，食過一輪好評票房內地又大賺，於是應聲而出有六月最新《追龍2》。我怎能不介紹大家睇，因為不能只有我看見。

典型港式大堆頭是今次《追龍2》予人風格，四位本地金像影帝梁家輝、古天樂、任達華、林家棟位位獨當一面，今回合演一個香港人熟到爛的人設「賊王張子強」，綁架案由梁家輝飾演賊王，然後再加入港式獨有「臥底」元素，由套套戲都有份的超人氣電影大亨古天樂做臥底，然後有中港澳三地警方合作通食，再炒埋一個王晶獨加元素「晶女朗」，今次力捧的內地女演員邱意濃，肯定唔及邱淑貞，不過睇王晶又點能夠無「女」呢？

追龍的故事係梁家輝飾演傳奇「賊王」綽號「大富豪」的龍志強，與古天樂飾演(臥底！)何天進行大鬥法，上演棋逢敵手的雙雄戲碼。二人夥拍林家棟(大賊身邊的專家！)、任達華(警察)，四位足智多謀，擦出巨星火花。然後再加上合拍片強大的汽車追逐、槍戰、爆破等動作場面，配合上劇情的緊湊，追龍能唔能夠維持到上一集難得建立的口碑呢？

要港產片重回90年代的輝煌係勉強的想法，但回到90年代風格卻有得唸，畢竟90年代式的王晶到而家仲存在，佢有心可以拍到好好的電影，無心大家都可以預計到……………….王晶的片，要睇就一起睇，唔可以得我一個睇到囉！

6月6日香港盛勢上映，唔知你會唔會有所期待！