作為曾經羽毛球男單世界第一嘅馬來西亞球手李宗偉，因為鼻咽癌問題自去年年中開始就再無參加任何比賽，即使如今已經抗癌成功，但仍然處於復康階段，再次回歸比賽仍然未有確實日期。

目前仍然未得到醫生批准參加比賽嘅李宗偉，除左狀態成疑外，按照世界羽聯最新嘅世界排名，呢位前世界第一最新嘅排名下跌80位至只有190位。

其實李宗偉嘅排名下跌絕對係無辦法避免的，因為佢無機會參加比賽，令佢本身嘅排名積分不斷減少，目前只係得翻去年打入印尼賽準決賽嘅8400分，所以如果今年7月舉行嘅印尼賽李宗偉仍然未能夠復出參賽，咁樣佢嘅積分將會歸零。而如果李宗偉積分真係歸零嘅話，亦將會代表其世界排名將會跌出2000名以外，因為目前擁有積分嘅球手據統計有2000人。

而其餘最新嘅排名，日本球手桃田賢斗仍然高舉世界第一寶座，而中國嘅石宇奇則僅隨其後排名第二，而前一哥丹麥嘅安賽龍則排名第三。另外，「超級丹」林丹排名第14位，香港嘅代表伍家朗則排名第16位。