「龜～波～氣～功～～～～～～」相信無睇過龍珠嘅，都知係乜嚟，近年再推動畫，更加將人氣重新推返上嚟。應該好多人都好似小熊咁，細細個時要扮演入面嘅角色嚟玩。有時見啲Youtuber 玩得幾過癮，都有啲衝動想搵啲黐黐呆呆嘅朋友一齊玩返次，但要訂造一套Cosplay 服又貴又費時，而今次有量產嘅Cosplay 服可以大家一齊訂返套嚟玩下啦！8月派貨，趕到十月哈佬喂呢！

主角必搶品，哩套衫幾乎係龍珠Signature 嚟。連對靴都有埋，真係一套過，着上身你唔係悟空都係無限啦！或者係亞樂！唔想做龜仙人徒弟，睇埋下面果啲。

有悟空，就有HeHe達，比達今次哩套係更新版，比之前出果套作出少少修改，比如條尾嘅顏色變返似動畫嘅深啡色。當然唔係真嘅撒亞人戰鬥服，唔會有無限伸展啦！唔好諗住買件加細碼就大肥佬都着得呀！

元佬級嘅笛子魔童，本身套衫都有佢相當嘅特色，而Cosplay 服更附埋佢嘅手臂紋(身)嘅衫袖，着上身，化少一啲位置，就可以出街啦！油綠塊面同埋手掌就得。

另一個元佬級嘅反派角色，亦係鳥山明先生開口講過最愛嘅角色之一，菲利。雖然鳥山明先生講愛嘅係第一形態嘅菲利，但經過修改後嘅第四形態無論喺動漫或者生產產品上，都有輕量化嘅改善，所以不斷鞭屍咁，死完又復活，又死又復活，由杜拉格斯一刀兩斷到佢又變返做宇宙最強嘅強者，可見受歡迎度幾高。哩套Cosplay 服特色唔多，一件頭，但着上身完成度極高，幾乎係整個系列拿捏外形最好嘅一款，但你先要練返一啲肌肉出嚟先着得「完美」。唯一缺點係爭對手套。

另一受歡迎度極高嘅(原)反派角色，魔人布歐。喺加入救世主果邊陣形後，變成主角隊嘅長青角色之一。肥布歐絕對係男男女女都喜愛嘅角色之一，果種可愛度為緊張嘅龍珠帶嚟一下嘅緩和，亦係產品皇牌之一。不過今次嘅Cosplay 服嚟講呢......未算到崩壞，但相比之下，應該係外觀上較差嘅一款，雖然見佢已經好努力去做好啲Detail 位，但原設定難搞已係事實，可能需要一個大肥佬着先好睇，雪哥可能會着得幾好睇。

龍珠Z Cosplay 服系列

派送日期：2019年8月預定
價錢：9,800円(悟空)、12,000(菲利、比達)、13,000(魔童、布歐、新版比達)
Size：參考各款服飾
質材：合成皮、Polyrester、棉、(各款不一，參考各款服飾)
產地：中國