曼聯門將迪基亞與曼聯嘅合同，將於2020年夏天到期，如果到時雙方亦未完成續約，咁迪基亞將會成為自由身球員，可免費加盟任何球隊。曼聯當然首選係同迪基亞續約，但如果雙方真係傾唔埋，佢地絕對唔想見到迪基亞免費離隊，所以最終可能迫使曼聯要將佢提早賣走。

對於曼聯黎講，佢地岩岩經歷左大起大落嘅一個球季，先有摩連奴被炒，再有蘇斯克查上任，並如有神助一樣踢出超好戰績，但臨近季尾表現卻一落千丈。因此，曼聯今夏必定會有大面積嘅球員變動，好似普巴究竟會唔會離隊呢？甚至連曼聯陣中表現最出色嘅迪基亞亦可能面臨被賣。

曼聯方面當然唔想失去迪基亞，但由於呢位主力與曼聯嘅談判好似無咩進展，所以有傳曼聯如今可能會考慮賣掉只係剩下一年合約嘅佢，以避免人財兩失。

目前為止，對迪基亞有興趣嘅球隊當然不少，其中法甲班霸巴黎聖日耳門有意出手，以迪基亞取代保方，而曼聯則可能會為迪基亞開價6000-7500萬鎊，為左順利令迪基亞轉投PSG，有傳曼聯甚至願意送2000萬鎊比佢，咁樣曼聯仍然可以從中獲得至少4000萬鎊嘅轉會費收入。

不過據聞迪基亞方面則希望可以完成曼聯嘅合同，然後明夏就可以自行決定加盟邊一支球隊，對於佢黎講自由度將會大增，因此唔知曼聯開出嘅2000萬鎊會唔會可以打動呢位球隊多年功臣呢？