勇士喺總決賽上唔單止最終不敵速龍失掉總冠軍，兩名核心Kevin Durant及Klay Thompson都受到重傷，預計下一季將會全季報銷。而其中KD嘅受傷其實係可以避免的，但因為隊醫嘅誤判，再加上勇士落後下情況危急，最終教練Steve Kerr決定讓KD帶傷上陣，最終做成如今嚴重嘅後果，對此Kerr亦表達自己後悔不已。

今年NBA總決賽第五場，勇士由於總局數已經處於落後1:3嘅關係，所以呢場如果唔博盡就好大機會1:4失落總冠軍。因此，KD成為勇士逆轉嘅關鍵戰力之一，所以經一輪評估後隊醫開綠燈，Kerr決定派KD上陣殺敵。而上陣後嘅KD的確為勇士帶來改變，最終勇士亦成功拿下呢場比賽。

可惜嘅係，KD喺第二節便因再傷到小腿而被迫退下火線...回想當時KD再次受傷，Kerr表示自己心入面只係諗:「佢又傷到小腿了，佢應該唔可以再打今年嘅總決賽，未來又要休養6個星期，但情況應該唔算好嚴重。」

不過當比賽完半場嘅時候，Kerr卻發現KD受傷嘅真正情況:「今次玩完了，呢個完全係唔同嘅情況，我地完全無諗過。如果我知道會傷及阿基里斯腱嘅話，我一定唔會比佢出場。對於KD同埋球隊黎講呢個都係毀滅性嘅傷害，我地可以做嘅就係盡可能收集訊息，然後落最好嘅決定。你下了決定，但結果卻係咁樣，我覺得我有部份責任，但我地喺做決定嘅過程係合理的。今次呢個結果係提醒我地，醫學界無野係100％保證的，你永遠不能確定任何事情嘅發生。」

雖然結果係殘酷，但係相信KD亦無悔喺第五戰上陣，因為佢自己亦表明因為籃球係佢嘅最愛，佢希望可以幫到隊友，最終第五戰真係獲得佢地想要嘅勝利，只不過代價實在太大了。