美斯作為巴塞隆拿嘅核心，個人曾五奪金球獎，並帶領巴塞4次奪得歐聯冠軍。不過自從2015年後，巴塞就再無染指過歐聯冠軍，當中嘅原因可以話眾說紛紜，而其中美斯你又覺得應該要背上多少責任呢？

剛過去嘅歐聯，巴塞成功打入賽事4強，並喺首回合領先利物浦3:0，當時基本上無人覺得利物浦可以逆轉，但結果次回合利物浦真係完成不可能嘅任務，竟然可以面對巴塞大勝對方4:0，最終逆轉晉身決賽，並且順利奪得冠軍。

對於再一次無緣歐聯冠軍嘅巴塞，前巴塞及曼聯領隊雲高爾認為，美斯係巴塞失落歐聯冠軍嘅其中一個主因。

雲高爾表示：「睇下巴塞，佢地話自己擁有世界最出色嘅球員，但佢地又贏到幾多次歐聯冠軍？」

「再睇下巴黎聖日耳門嘅尼馬，佢地又贏到幾多次歐聯冠軍？」

「尼馬及美斯單計獨立個體球員都係最好的，但佢地並唔係一名團體型球員。」

「美斯必須問自己，點解佢地咁耐都無再贏過歐聯冠軍。」

「佢(美斯)係世界上最好嘅個體球員，因為佢嘅數據實在係難以置信，我好鍾意佢的。不過，點解佢過去5年都贏唔到歐聯冠軍？作為隊長，他必需要問點解佢嘅球隊唔能夠成為歐洲冠軍。」