NBA今夏自由球員及交易市場可以話非常精彩，當你以為Anthony Davis加盟湖人已經係最大嘅消息後，誰不知Kawhi Leonard竟然決定重返洛杉磯加盟快艇，然後Paul George竟然被交易到快艇與Leonard成為拍檔，呢個相信無咩人事前估得到。

Kawhi加上PG，呢個相信係唔少人心目中嘅夢幻組合之一，要知道兩位球員絕對算得上係當今聯盟攻防一體最佳嘅球員之一(大膽講句二人可能係當今NBA攻防一體最強嘅球員)。其中Leonard曾兩度成為年度最佳防守球員，並三次入選年度最佳防守一陣及兩次入選年度最佳防守二陣，而PG則兩次入選年度最佳防守一陣及兩次入選年度最佳二陣，同時二人亦曾經1次當選年度偷波王。因此防守上二人都將會為快艇帶來極大改變，1+1會唔會大過2，相信就要球迷拭目以待。

而唔單止係Kawhi同PG，快艇仲有Patrick Beverley呢位人稱「瘋狗」嘅防守型控衛，佢分別1次入選年度最佳防守一陣及二陣，其貼身防守喺NBA出晒名，今年嘅季後賽防守Kevin Durant嘅片段相信大家仍然歷歷在目，強如KD面對Beverley嘅防守都無晒乎就知有幾恐佈。

所以，當Kawhi + PG + Beverley出現喺場上，究竟呢一隊嘅防守會有幾恐佈呢？Beverley貼身防守對方一名外線嘅一名主力，然後Kawhi同PG可以組成極大嘅窒息性防守覆蓋面，再加埋另外兩名球員嘅協防，真係諗起都抖唔到氣，誇張啲講句單係佢地三個一場隨時出現可以偷波10-20次。

正所謂「進攻贏比賽，防守贏冠軍」，快艇今次組軍明顯係針對防守嘅提升，並且係一次飛躍性嘅提升，佢地嘅防守強度將會大大增加未來球隊喺季後賽嘅優勢。

當然，除左防守Kawhi同PG嘅進攻亦唔講得少，其中今年嘅總決賽MVP Kawhi嘅穩定唔使講，場均接近50%嘅命中率，今年季後賽得分場均達到30.6分。而傷癒回歸嘅PG，表現更進一步，今年常規賽場均得分達到28分，季後賽更升至28.6分，兩位巨星嘅配合實在令人非常期待。

講到進攻快艇後備仲有一個三屆NBA最佳第六人嘅Lou Williams，上季佢喺常規賽場後備上陣場均可以拎到20分，而季後賽則增加至21.7分，預計佢將會繼續係球隊後備最強大嘅火力輸出，而佢可能再唔使好似一名偽正選咁，可以真真正正帶領後備陣容去搶分，因為正選已經有足夠火力得分。呢支快艇陣容實在變得更加攻防平衡，實力提升唔至一個層次，加上勇士因傷已經四分五裂，快艇黎緊一季挑戰總冠軍絕對唔係無可能。