雖然MenClub嘅巴打未必對《大叔的愛》呢套日劇感興趣，但偏偏呢套腐女日劇又成功入屋，吸引眾多女女收看，就連唔睇BL嘅女仔亦都沉埋一份。《大叔的愛》更於2018東京電視劇大賞中奪3冠，而且仲係Twitter Japan喺2018年度中最多被使用嘅Twitter帳號同標籤，可以睇得出《大叔的愛》真係相當有話題性，家下佢仲決定出埋電影版，巴打們唔想同女仔冇話題的話，唔睇都要識少少扮下代表呀！

《大叔的愛》係講述冇異性緣嘅異性戀主角春田創一，被尊敬嘅上司部長黑澤武藏及同事兼室友嘅後輩牧凌太告白，進而展開戀愛喜劇故事。之前MenClub都同大家提及過《大叔的愛》會推出電影版，內容大致係延續日劇嘅結局，講述日劇結局1年後嘅故事，春田經過上海、香港嘅外派後返到日本工作，公司裡面除咗原本熟悉嘅同事之外，仲多咗新人山田正義。喺呢個時候，總公司就派咗前來擔當新企劃小組「Genius7」組長嘅狸穴迅過嚟，並通知春田等人都必須參與新企劃，仲將牧調入企劃小組當中，而呢場總公司同營業所之間嘅戰爭，亦令牧同春田間產生距離……另一方面狸穴迅同山田正義亦分別對牧同春田產生好感，令全部人嘅關係變得更加複雜……

而今次電影版除咗主演三人不變之外，內田理央、金子大地、伊藤修子、兒島一哉、大塚寧寧等班底都會繼續參與電影演出，另外仲加入新演員志尊淳以及澤村一樹。《大叔的愛》電影版將於8月23日喺日本上映，如無意外香港遲下都會有得睇。如果巴打身邊都有女性朋友鍾意呢套日劇，不妨睇下《大叔的愛》電影版最新預告，到時同女仔都多個話題傾下嘛！