溫布頓網球錦標賽決賽，喺四強成功擊敗宿敵嘅「瑞士天王」費達拿遇上另一競敵祖高域，雙方激戰4盤後打成2:2平手，最終雙方需要進行第5盤，並且要動用溫網歷次首次嘅「Tie Break」以分勝負。

即將38歲嘅「費天王」，四強成功拍走「泥地王」拿度，以證明自己仍然喺草地王者嘅身份。不過決賽嘅對手祖高域，則可以話係費達拿嘅剋星，所以後者想第9度奪冠並唔係咁易。

果然，雙方激戰4盤後打成2:2平手，需要進入決賽局先可以分到勝負，而溫網嘅決賽局以往都係一直以長盤制進行，但今次則會喺12:12之後以「搶七」形式進行，果然兩位球手真係打到12:12，最後需要動作溫網歷史首次嘅「Tie Break」。

喺「Tie Break」中，祖高域成功破發搶到主動權，最終費達拿未能扳回劣勢，最終以細分7:3輸掉「搶七」，同時亦宣告賽事冠軍係祖高域。另外，今次雙方嘅決賽歷時4小時55分鐘，打破大會最長比賽時間紀錄，上一個紀錄係2008年費達拿vs拿度嘅決賽，當時二人嘅比賽時間亦長達4小時47分鐘。

今次係祖高域生涯第5次舉起溫網冠軍，而第12次打入溫網決賽嘅費達拿則第4次飲恨，但以即將38歲嘅年齡仍然可以打出一場咁精彩嘅比賽，實在係令人非常敬佩。