千年一遇嘅橋本環奈擁有天使級嘅超高顏值，最適合就係拍二次元感滿滿嘅漫改作品，過去佢亦有參與唔少漫改電影又或者係劇集，比如《暗殺教室》、《銀魂》、《齊木楠雄的災難》、《我是大哥大!!》等等，不過睇得又玩得嘅環奈BB多數喺漫改作品中，都會展露出誇張顏藝，有違天使形象，係就係睇得好過癮，但就冇得好好地欣賞環奈BB美麗嘅一面！而呢次《午夜0時的吻》真人電影，終於可以見到橋本環奈正正經經咁飾演唯美嘅美少女角色！

《午夜0時的吻》係Mikimoto凜所作嘅漫畫，故事講述花澤日奈奈（橋本環奈飾演）係一個認真、為人謙遜嘅美少女，佢時不時都會幻想終有一日可以同王子戀愛。而某日國民巨星綾瀨楓（片寄涼太飾演）嚟到佢就讀嘅高中拍戲，日奈奈意外地發現咗楓不為人知嘅秘密，於是兩人就做咗一個約定。而日奈奈無意間亦被楓不加掩飾嘅素顏同溫柔所吸引，與此同時，楓亦對日奈奈嘅坦率所心動。喺呢個時候，一直暗戀日奈奈嘅青梅竹馬浜邊彰（真榮田鄉敦）就突然向楓下戰書……

雖然呢套作品劇情係有啲老套，但作為橋本環奈嘅粉絲，可以望到靚靚嘅橋本環奈演足全場已經沒有不看的理由！一齊睇睇《午夜0時的吻》嘅預告先！