《聖鬥士星矢》呢套經典動漫係唔少男士寶貴嘅童年回憶，到而家好多人都Keep住收藏佢哋嘅周邊商品或者Figure等等。雖然《聖鬥士星矢》已經係N年前嘅產物，但唔代表佢會被時代淘汰！早前日本「週刊少年チャンピオン創刊50周年」大感謝祭活動當中，「《聖鬥士星矢》冥王神話ND展區」裡面就展出咗「等身大蛇夫座黃金聖衣」，唔少粉絲都衝去影相，事關呢個「等身大蛇夫座黃金聖衣」實在太過震撼，如果唔係睇相而係有機會親眼見識下就好喇！！！

喺7月15日嘅「週刊少年チャンピオン創刊50周年」大感謝祭，官方將旗下嘅作品做成展覽畀大家參觀，而當中以「《聖鬥士星矢》冥王神話ND展區」嘅「等身大蛇夫座黃金聖衣」最為矚目。「等身大蛇夫座黃金聖衣」嘅原型係奧德修斯，佢係車田正美老師嘅正統續作「聖鬥士星矢 NEXT DIMENSION 冥王神話」中出現嘅「蛇夫座黃金聖鬥士」。

「蛇夫座黃金聖鬥士」係神話時代第十三位黃金聖鬥士，亦係聖域中唯一一位被稱作神嘅人，佢被譽為聖域中最高貴、最偉大嘅存在，喺某種意義上，佢甚至比雅典娜仲能夠掌握所有聖鬥士嘅心。同時佢亦係八十八位聖鬥士中嘅最強者，僅僅甦醒嘅前奏就已經令全宇宙崩壞。不過因為佢係一位醫者，所以絕對唔會出手戰鬥。

一齊睇睇呢個傳說中嘅黃金聖鬥士有幾威風啦！