近日有關於勇士球星Stephen Curry嘅紀錄片《Stephen VS. The Game》正喺網上播放，而該紀錄片嘅製片人Gotham Chopra就接受訪問，原來佢都係之前Kobe Bryant個人紀錄片《Muse》嘅製片人，而佢喺訪問期間談到拍攝兩套紀錄片時有咩大分別。

對於拍攝兩套紀錄片嘅分別，Chopra就以「快樂」黎形容拍攝Curry嘅紀錄片，因為佢覺得Curry為人謙虛，平易近人。相反，佢則以「緊張」黎形容與Kobe嘅合作，因為對方嘅要求實在非常高，甚至有啲無理。

Chopra表示，當年拍攝《Muse》嘅時候，Kobe曾凌晨3點發短訊比佢，因為有野同佢傾，最後Chopra只能夠立即出發搵Kobe，並一傾就傾到天光。

另外一次，Chopra表示喺《Muse》嘅製作後期階段，Kobe表示希望Chopra可以去到自己辦工室附近居住一段時間，並可以親自為佢搵住處，以爭取時間進行後期製作。對此，Chopra向Kobe表態，直指搵地方住唔難，但唔可以將佢嘅家人一併帶來。

唔少人都知道Kobe對籃球非常認真，甚至令身邊隊友都難以適應，而呢種性格甚至連佢退役後都一直保持住，但可能正正因為呢種性格，佢先可以取得空前嘅成功，亦都造就左「凌晨4點」嘅傳奇。