世界最著名嘅冰球聯賽，絕對就係美國嘅NHL，佢係屬於北美四大運動之一，擁有極多球迷支持。而冰球嘅魅力，好大程度上取決於佢嘅速度以及技術，因為冰球員需要兼顧溜冰，同時又要控制球棍，仲要一眼關七睇清楚隊友嘅位置。

而與大部份球類運動一樣，冰球擁有不少獨特嘅規則，而當中一條「鬥毆(fisticuff)」就屬於非常罕見嘅存在。

NHL當中嘅「鬥毆」，規定雙方球員進行時必須放低球棍以1對1嘅方式進行，同時必須脫下手套，因為手套嘅結構及材質有可能會造成比徒手打擊更嚴重嘅傷勢，亦即係換句話說雙方要赤手空拳對打。另外，球員亦都必須喺裁判將雙方分開嘅時候停止繼續鬥毆，如果未能遵守以上規則嘅球員會立刻受到場上處罰，甚至有可能被禁賽。

對於「鬥毆」行為裁判都會讓佢地進行，直至有一方或雙方球員都摔落冰面，裁判先會將雙方分開。另外，如果出現多對1嘅情況出現，裁判亦會立刻阻止。

而判罰方面，裁判會把參加「鬥毆」嘅球員罰出場5分鐘，其實呢5分鐘亦都可能係比佢地有少少時間冷靜一下。

不過以上「鬥毆」基本上只係適用於NFL聯賽，其餘賽事如果出現「鬥毆」情況，大部份球員都會被罰停賽。